ఈ ఆసనాలు ప్రాక్టిస్‌ చేస్తే.. మలబద్ధకం నయం అవుతుంది..!

వజ్రాసనం..

రోజూ వజ్రాసనం వేయడం వల్ల.. జీర్ణవ్యవస్థకు అనేక విధాలుగా మేలు జరుగుతుంది. వజ్రాసనం.. కాళ్లు, తొడలకు రక్తప్రసరణను పరిమితం చేసి.. ఉదర ప్రాంతాన్ని బ్లడ్‌ సర్కులేషన్‌ పెంచుతుంది. తద్వారా.. మన పేగుల కదలికలను మెరుగుపరుస్తుంది, మలబద్ధకం సమస్య దూరం అవుతుంది. ఇది మలద్వారం, జననాంగాలకు మధ్య ఉండే వజ్రనాడిని ప్రభావితం చేస్తుంది. ఆహారం జీర్ణం కావటానికి తోడ్పడుతుంది. భోజనం చేసిన 5-20 నిమిషాల తర్వాత వేస్తే ఎంతో మేలు చేస్తుంది. మలబద్ధకం, పులితేన్పులు, మొలలు, హెర్నియా నివారణకు తోడ్పడుతుంది.

ఎలా వేయాలి..

రెండు కాళ్లను తిన్నగా చాచి కూర్చోవాలి. ఒకదాని తర్వాత మరో కాలును మోకాళ్ల దగ్గర వంచుతూ వెనక్కి తీసుకురావాలి. పాదాలను పిరుదుల కిందికి తీసుకురావాలి. మడమలు దూరంగా ఉంచుతూ.. బొటనవేళ్లు తాకేలా చూసుకోవాలి. అరచేతులను మోకాళ్ల మీద ఆనించి ఉంచాలి. శరీర బరువు పిరుదుల మీద సమానంగా పడేలా చూసుకోవాలి. తల, వెన్నెముక నిటారుగా ఉంచాలి. కళ్లు మూసుకొని నిదానంగా శ్వాసను తీసుకోవాలి. ఈ స్థితిలో 5 నుంచి 10 నిమిషాలు ఉండటానికి ప్రయత్నించండి. వజ్రాసనం వేసేటప్పుడు ధ్యాసను శ్వాస మీద కేంద్రీకరించాలి.

ఉష్ట్రాసనం..

ఉష్ట్రాసనం వల్ల ఒత్తిడి తగ్గుతుంది, మనస్సు ప్రశాంతంగా ఉంటుంది, రక్తప్రసరణ మెరుగుపడుతుంది, తొడ ప్రాంతం నుంచి కొవ్వు కరుగుతుంది, జీర్ణక్రియ మెరుగుపడుతుంది, కండరాలు స్ట్రాంగ్‌ అవుతాయి. న్నెముకను దృఢంగా చేస్తుంది. నాడీ వ్యవస్థ ప్రశాంతంగా పనిచేయటానికి తోడ్పడుతుంది.

ఎలా వేయాలి..

దీన్ని ఒంటె ఆసనమనీ అంటారు. వజ్రాసనంలో కూర్చోవాలి. మోకాళ్ల మీద లేవాలి. చేతులను పక్క తొడలకు తాకించి ఉంచాలి. ఇప్పుడు శ్వాస తీసుకుంటూ నెమ్మదిగా వెనక్కి వంగాలి. కుడి అరచేయిని కుడి పాదం మీద, ఎడమ అరచేతిని ఎడమ పాదం మీద ఆనించాలి. వెనక్కి వంగినప్పుడు మోకాళ్లు పైకి లేవకుండా చూసుకోవాలి. కాసేపు అలాగే ఉండి, శ్వాస తీసుకుంటూ పైకి లేవాలి. తిరిగి వజ్రాసనంలో కూర్చోవాలి.

పవన్ముక్తాసనం..

మలబద్ధకం నుంచి ఉపశమనం పొందడానికి, మీ ప్రేగులను మసాజ్ చేయడాని, పేగు కదలికలను ఉత్తేజపరచడానికి.. ఈ యోగాసనం సమర్థవంతంగా పని చేస్తుంది. ప్రతిరోజూ దీన్ని ప్రాక్టిస్‌ చేయడం వల్ల జీర్ణవ్యవస్థ మెరుగ్గా పనిచేస్తుంది. అపాన వాయువు బయటకు వెళ్లుతుంది. మలబద్ధకం తగ్గుతుంది. కడుపు శుద్ధి అవుతుంది. పొట్టలో కొవ్వు కరిగి ఊబకాయం తగ్గుతుంది.

ఎలా వేయాలి..?

విశ్రాంత స్థితిలో వెల్లకిలా పడుకోవాలి. మోకాళ్లను మడిచి, పొత్తికడుపు దగ్గరకు తీసుకురావాలి. చేతులతో కాళ్లను పట్టుకుని తోడలు, పొత్తికడుపునకు ఒత్తిడి కలిగిస్తూ మోకాళ్లు ముఖం దాకా వచ్చేలా చేయాలి. తలను పైకెత్తి, గడ్డం ఛాతీకి ఆనించాలి. ఇలా 60 నుంచి 90 సెకన్లు ఈ భంగిమలో ఉండి, తిరిగి యథాస్థితిలోకి రావాలి.

నీరు ఎక్కువగా తాగండి..

మలబద్ధకం సమస్యను దూరం చేయడానికి ప్రతిరోజూ తగినన్ని నీళ్లు తాగాలని నిపుణులు చెబుతున్నారు. రోజూ కనీసం ఏడెనిమిది గ్లాసుల నీళ్లు తాగాలి. మిమ్మల్ని హైడ్రేటెడ్‌గా ఉంచడానికి తగినన్ని నీళ్లు తాగాలి.

ఈ ఆహారం తినండి..

మీ ఆహారంలో ఫైబర్‌ ఎక్కువగా ఉండేలా చూసుకోండి. ప్రతిరోజూ వెజిటబుల్‌ సలాడ్స్‌ తీసుకుంటే మంచిది. మీరు తీసుకునే ఆహారంలో తాజా పండ్లు ఎక్కువగా తీసుకోండి. నీటిపాళ్లు ఎక్కువగా ఉంటే పండ్లు తినండి. మెులకెత్తిన గింజలు ఎక్కువగా తీసుకుంటే మలబద్ధకం తగ్గుతుంది. పొట్టుతో ఉన్న ధాన్యాలు, పప్పుధాన్యాలు మీ డైట్‌లో చేర్చుకోండి.

గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.