ప్రపంచానికి పెద్దన్నకు అధ్యక్షుడిగా వ్యవహరించటం అంటే మాటలు కాదు. ఇంతటి అత్యున్నత పదవిలో ఉండి కూడా చిన్నపిల్లాడి మాదిరి వ్యవహరించే ఆ దేశ అధ్యక్షుడు ట్రంప్.. తాజాగా మరో అల్లరి పనితో ఆగమవుతున్న పరిస్థితి. కోట్లాది మంది మనోభావాలు ఏమవుతాయన్న ధ్యాస లేకుండా.. తాను కోరుకున్నది తీర్చుకునేందుకు ఏఐను వాడేసుకోవటం చూస్తే.. ఓర్నీ వేషాలో అనుకోకుండా ఉండలేం. ఇంతకూ ట్రంప్ చేసిన సరదా పనికి పెద్ద ఎత్తున విమర్శలు వెల్లువెత్తుతున్నాయి.
అయినా.. ఇలాంటి వాటిని ట్రంప్ పెద్దగా పట్టించుకోరనుకోండి. తనకు అవకాశం లభిస్తే తానే పోప్ అవుతానని.. అదే తన మొదటి ఛాయిస్ అంటూ ఇటీవల చెప్పిన అమెరికా అధ్యక్షుడు ట్రంప్.. తాజాగా అన్నంత పని చేశారు. కాకుంటే.. ఏఐ ఇమేజ్ తో. పోప్ వేషధారణతో ఉన్న తన ఫోటోను సోషల్ మీడియాలో షేర్ చేసుకున్నారు.
పోప్ వేషంలో ఉన్న ట్రంప్ ఫోటో వైరల్ గా మారింది. అయితే.. ఈ ఫోటోపై పలు విమర్శలు వెల్లువెత్తుతున్నాయి. అమెరికా అధ్యక్షుడి హోదాలో ఉన్న వ్యక్తి పోప్ వేషధారణలో కనిపించటాన్ని పలువురు తప్పు పట్టారు. చాలా కొద్ది మంది మాత్రం ట్రంప్ అటెంప్టును మెచ్చుకున్నారు. పోప్ వేషంలో ట్రంప్ కనిపించటం గౌరవప్రదంగా లేదన్న వ్యాఖ్యలు చేస్తున్నారు. పోప్ మరణించిన కొద్ది రోజులకేఇలాంటి వేళకోళం ఏమిటంటూ ఆగ్రహాన్ని వ్యక్తం చేస్తున్నారు.
బైబిల్ ప్రవచించిన పది నైతిక విలువలను పాతరేసిన ట్రంప్ లాంటి వ్యక్తి.. ఇప్పుడు అత్యంత గౌరవప్రదమైన పోప్ వేషంలో కనిపించటం విడ్డూరంగా ఉందంటూ ఆగ్రహాన్ని వ్యక్తం చేస్తున్నారు డెమోక్రాటిక్ నేతలు. ఏమైనా.. ఇలాంటి చేష్టలు ట్రంప్ కు మాత్రమే సాధ్యమవుతాయని చెప్పక తప్పదు.
The post ఓర్నీ వేషాలో.. ఏఐతో ‘పోప్’ కోరికను తీర్చేసుకున్న ట్రంప్ first appeared on namasteandhra.
