– Advertisement –
చంద్రబాబుకు అధికారాన్ని ఇస్తే చంద్రముఖిని లేపినట్టవుతుందనేది తాను ముందే చెప్పానని మాజీ సీఎం జగన్ అన్నారు. స్థానిక సంస్థల వైఎస్సార్‌సీపీ ప్రతినిధులను ఉద్దేశించి జగన్ మాట్లాడుతూ..టీడీపీ ప్రభుత్వం ఎన్నికల మేనిఫెస్టోను అమలు చేయకపోతే పెద్దఎత్తున నిరసనలు ప్రారంభిస్తామని హెచ్చరించారు.
స్థానిక సంస్థల ఎన్నికల్లో బలం లేకున్నా అధికార బలంతో అవిశ్వాస తీర్మానాలు పెడుతూ అనైతిక రాజకీయాలు చేస్తున్నారని మండిపడ్డారు. ఉప ఎన్నికలు, నో కన్ఫిడెన్స్ తీర్మానాలకు ధైర్యంగా ఎదుర్కొంటున్న తమ పార్టీ నాయకులు, కార్యకర్తలను జగన్ అభినందించారు.
వైఎస్సార్‌సీపీ నాయకులను కించపరిచేందుకు కుట్రలు పన్నుతోందని, అసలు సమస్యల నుండి ప్రజల దృష్టి మళ్లించేందుకు సంకీర్ణ ప్రభుత్వం దీన్ని ఓ వ్యూహంగా వినియోగిస్తోంది అని ఆరోపించారు. రాష్ట్రాన్ని టీడీపీ దోచుకుంటోందని జగన్ ఆరోపించారు. ఉర్సా క్లస్టర్స్ అనే అనుభవం లేని డేటా కంపెనీకి రూ. 3,000 కోట్ల విలువైన భూమిని కేవలం 99 పైసలకు ఎకరాకు కేటాయించడం అవినీతికి నిదర్శనమన్నారు.
ఇప్పుడు ఒక్క ఇడ్లీ కూడా ఒక్క రూపాయికి దొరకదు. కానీ చంద్రబాబు 59 ఎకరాల విలువైన భూమిని ఉర్సా క్లస్టర్స్ అనే కంపెనీకి 99 పైసలకు ఇస్తున్నారు. ఈ కంపెనీ రెసిడెన్షియల్ అపార్ట్‌మెంట్‌లో పనిచేస్తోంది. దానికి వెబ్‌సైట్ లేదు, ఫోన్ నంబర్ లేదు అన్నారు. విశాఖపట్నంలో రూ. 1,500 కోట్లు నుండి రూ. 2,000 కోట్ల మధ్య విలువ ఉన్న భూమిని లూలూ గ్రూప్‌కు టెండర్లు లేకుండానే ఇచ్చారనీ అది కూడా అవినీతికి ఉదాహరణ అన్నారు.
వైఎస్సార్‌సీపీ పాలనలో ఒక్క బటన్ నొక్కగానే పథకాల లబ్ధిదారుల ఖాతాల్లోకి నేరుగా డబ్బు జమయ్యేది అని గుర్తు చేశారు. ప్రస్తుత ప్రభుత్వం అధికారంలోకి వచ్చిన తర్వాత విద్యుత్ బిల్లులు పెరిగాయని, మద్యం ధరలు భారీగా పెరిగాయని, ఉచిత మట్టి పాలసీ పేరుతో ఇసుకను రెట్టింపు ధరలకు అమ్ముతున్నారని జగన్ తెలిపారు. దీని వల్ల ప్రజల్లో కలుగుతున్న ఆగ్రహాన్ని తప్పించేందుకు వైఎస్సార్‌సీపీ నేతలపై తప్పు కేసులు బనాయించి, అరెస్టులు చేస్తున్నారని ఆరోపించారు. మళ్లీ వైసీపీ అధికారంలోకి వస్తుందని అప్పుడు వడ్డీతో సహా చెల్లిస్తామన్నారు.
