రాయిటర్స్ ప్రకారం.. రోస్కోస్మోస్ ప్రయోగించిన లూనా-25 ప్రతిష్టాత్మక కాలక్రమాన్ని వివరించింది. శుక్రవారం ప్రయోగించిన వ్యోమనౌక చంద్రుని కక్ష్యలోకి కేవలం ఐదు రోజుల్లోనే చేరుతుంది. అనంతరం చంద్రుని ఉపరితలంపై దిగడానికి మరో ఐదు నుంచి ఏడు రోజులు పడుతుంది. లూనా 25 ఆగస్టు 16న చంద్రుడిని చేరుకుని కక్ష్యలోకి ప్రవేశిస్తుందని, ఆపై ఆగస్టు 21 నాటికి ఉపరితలంపై దిగేందుకు ప్రయత్నిస్తుందని న్యూయార్క్ టైమ్స్ నివేదించింది.
విజయవంతంగా లునా-25ను నింగిలోకి పంపిన రష్యాకు ఇస్రో శుభాకాంక్షలు తెలిపింది. ‘లునా-25ను విజయవంతంగా ప్రయోగించినందుకు రోస్కోస్మోస్ శుభాకాంక్షలు… మన అంతరిక్ష ప్రయాణాలలో మరొసారి కలుసుకోవడం చాలా అద్భుతం’ అని ట్వీట్ చేసింది.
చంద్రుడిపై రెండు వారాల పాటు పరిశోధనలకు రూపొందించిన చంద్రయాన్-3 బరువు 1.8 టన్నులు.. ఏడాది పాటు అధ్యయనం కోసం శాస్త్రీయ పరికరాలు కలిగి ఉన్న లునా-25 కేవలం 31 కిలోల (68 పౌండ్ల). చంద్రయాన్-3ని ఇ-లాంచ్ వెహికల్ మార్క్-III M4 రాకెట్‌తోనూ.. లునా-25ను సోయుజ్-2 ఫ్రీగాట్ బూస్టర్‌తో నింగిలోకి పంపారు. చంద్రుడి దక్షిణ ధ్రువం, ఎక్సోస్పియర్ ప్లాస్మా, ధూళి కణాలను పరిశోధించడం దీని లక్ష్యం.
చంద్రయాన్ -3, లునా 25 ల్యాండింగ్ సైట్‌లు రెండు దక్షిణ ధ్రువాలే కావడం గమనార్హం. నిపుణుల అభిప్రాయం ప్రకారం.. చంద్రుడి దక్షిణ ధ్రువం భూభాగాన్ని నావిగేట్ చేయడం అంత తేలికైన పని కాదు. రష్యా అంతరిక్ష పరిశోధనా సంస్థ ప్రయోగించిన ‘లునా-25’ శుక్రవారం తెల్లవారుజామున 2.10 గంటలకు వోస్తోక్నీ కాస్మోడ్రోమ్‌ నుంచి నింగిలోకి దూసుకెళ్లింది. ఇది కేవలం ఐదు రోజుల్లోనే సుమారు 4 లక్షల కి.మీ. దూరంలో ఉన్న జాబిల్లి కక్ష్యలోకి చేరనుంది. అనంతరం ఇప్పటి వరకూ ఎవరూ వెళ్లని దక్షిణ ధ్రువంలో ల్యాండింగ్ చేయనున్నారు. కక్ష్యలోకి చేరిన వారం రోజుల్లో ల్యాండింగ్‌కు రష్యా శాస్త్రవేత్తలు ప్లాన్ చేస్తున్నారు.
Read More Latest Science & Technology News And Telugu News