ప్రభుత్వ రంగ రుణదాత పంజాబ్ నేషనల్ బ్యాంక్ (PNB) 0రూ.2 కోట్ల లోపు ఫిక్స్‌డ్ డిపాజిట్లపై వడ్డీ రేట్లను పెంచింది. కొత్త వడ్డీ రేట్లు జూలై 4, 2022 నుంచి అమల్లోకి వస్తాయని బ్యాంక్ అధికారిక వెబ్‌సైట్ పేర్కొంది. 1 సంవత్సరం నుంచి 2 సంవత్సరాల వరకు, 3 సంవత్సరాల వరకు మెచ్యూర్ అయ్యే ఫిక్స్‌డ్ డిపాజిట్లపై వడ్డీ రేట్లను 10 నుంచి 20 bps వరకు పెంచింది. 7 నుంచి 45 రోజుల మెచ్యూరిటీ వ్యవధితో ఫిక్స్‌డ్ డిపాజిట్లపై 3 శాతం వడ్డీ రేటును కొనసాగిస్తుంది.

అలాగే 46 నుంచి 90 రోజుల మెచ్యూరిటీ వ్యవధితో డిపాజిట్లపై 3.25 శాతం వడ్డీ రేటును అందిస్తోంది. 180 రోజులు లేదా ఒక సంవత్సరం లోపు మెచ్యూర్ అయ్యే ఫిక్స్‌డ్ డిపాజిట్లపై 4.50 శాతం వడ్డీ రేటు ఇవ్వనుంది.91 నుంచి 179 రోజులలో మెచ్యూర్ అయ్యే డిపాజిట్లపై 4.00 శాతం వడ్డీ రేటు అందిస్తోంది. 1 సంవత్సరం, రెండు సంవత్సరాల వరకు మెచ్యూర్ అయ్యే డిపాజిట్లపై, PNB ఇప్పుడు 5.30 శాతం వడ్డీ రేటును అందిస్తుంది.

2 సంవత్సరాలు, మూడు సంవత్సరాల వరకు మెచ్యూర్ అయ్యే డిపాజిట్లపై వడ్డీ రేట్లను 5.30 శాతం నుంచి 5.50 శాతానికి పెంచింది. మూడేళ్లు, ఐదేళ్ల వరకు మెచ్యూర్ అయ్యే డిపాజిట్లపై 5.50 శాతం వడ్డీ రేటు కొనసాగుతుంది. ఐదేళ్లు, పదేళ్ల వరకు మెచ్యూర్ అయ్యే డిపాజిట్లపై PNB గరిష్ట వడ్డీ రేటు 5.60 శాతం లభిస్తుంది. సీనియర్ సిటిజన్లు మెచ్యూరిటీలకు వర్తించే కార్డ్ రేట్లపై 50 bps అదనపు వడ్డీని పొందుతారు.