తెలంగాణల బోనాల పండగ అంటే అందరికీ పోతురాజులు, బోనం, పోలేరమ్మ, ఎల్లమ్మ వంటి దేవతలే గుర్తొస్తరు. గిప్పుడైతే భాగ్యనగరంలో జరంతా బోనాల పండగ ఫేమస్ అయ్యింది కానీ.. ఒకప్పడు ప్రతి ఒక్క ఊళ్లో ఈ బోనాల పండుగను మస్తుగా జరుపుకునేటోళ్లట. ప్రస్తుతం తెలంగాణ సర్కార్ ఈ పండుగను రాష్ట్ర పండుగగా నిర్వహిస్తూ వస్తోంది. ఈ పండగలో భాగంగా తొలి బోనాన్ని గోల్కోండ కాడే ఎత్తుకుని బైలెల్లుతరు. మొదలు ఈడ బోనం స్టార్ట్ అయినకే.. అన్ని చోట్ల బోనాలను ఎత్తుకుంటారు. తొలి బోనాన్ని ప్రతి ఏటా ఆషాఢ మాసంలో తొలి గురువారం లేదా ఆదివారం నాడు షురు అవుతాయి. ఈ ఏడాది కూడా గురువారం నుండే షురు అయినయ్. ఈ నేపథ్యంలో భాగ్యనగరంలో నాలుగు వారాల పాటు ఒక్కో వారంల ఒక్కో గుడిల ఎందుకని బోనాల పండుగ సంబురాలను మస్తుగా నిర్వహిస్తారు.. దీని వెనుక ఉన్న కథా కమామిషు ఏంటో చూసెద్దాం పదండి..

​తొలి బోనం..

ప్రతి ఏటా బోనాల పండుగ సంబురాల సందర్భంగా భాగ్యనగరంల పోచమ్మ, ఎల్లమ్మ, మైసమ్మ, బాలమ్మ, ముత్యాలమ్మ, మహంకాళమ్మ, పెద్దమ్మ ఇలా ఏడుగురు అక్కా చెల్లెళ్ల దేవాలయాలన్నీ ముస్తబవుతాయి. ముందుగాల గోల్కోండలో ఉన్న జగదాంబిక అమ్మవారి ఆలయంలో తొలి బోనం ఎత్తుతరు. ఆ తర్వాతే ఇతర ప్రాంతాల్లో బోనం ఎత్తడం షురూ చేస్తారు. ఆషాఢ మాసంల వచ్చే ప్రతి ఆదివారం, గురువారం రోజున బోనాల పండుగ సంబురాలను మస్తుగా జరుపుకుంటారు.

Jupiter Retrograde in Pisces : గురుడి తిరోగమనం వల్ల ఈ 4 రాశుల ఉద్యోగులకు అదృష్టం..!

​బోనం అంటే..

బోనం అంటే భోజనం అని అర్థం. అమ్మవారికే సమర్పించే నైవేద్యాన్ని బోనం అంటారు. ఈ బోనాల పండగను దాదాపు వెయ్యేళ్ల సంధి జరుపుతా ఉన్నారు. చరిత్రను పరిశీలిస్తే.. కాకతీయ రాజులలో ఒకరైన ప్రతాప రుద్రుడు గోల్కోండలోని శ్రీ జగదాంబిక ఆలయంలో బోనాల సమయంలో ప్రత్యేక పూజలు చేసినట్లు పెద్దలు చెబుతారు. ఆ తర్వాత వచ్చిన ముస్లిం నవాబులు సైతం ఇక్కడ పూజలు జరుపుకునేందుకు పర్మిషన్ ఇచ్చిండ్రు. అంతేకాదు భాగ్యనగరంలోని జగదాంబిక అమ్మవారి అతి పురాతన ఆలయంగా ప్రసిద్ధి గాంచింది. అందుకే ఇక్కడ తొలి బోనం షురు అయితది. రెండో బోనం బల్కం పేట రేణుక ఎల్లమ్మ గుడిలో ఎత్తుతరు. మూడో వారం సికింద్రాబాదులోని ఉజ్జయిని మహంకాళి ఆలయంలో ఎత్తుతరు.

​1815లో..

1815-

సికింద్రాబాదులోని ఉజ్జయిని మహంకాళి ఆలయానికి ఓ చరిత్ర ఉంది. బ్రిటీష్ పాలన సమయంలో ఈ ప్రాంతానికి చెందిన సురటి అప్పయ్య అనే వ్యక్తి ఆంగ్లేయుల రాజ్యంలో చేరిన తర్వాత 1813వ సంవత్సరంలో మధ్యప్రదేశ్ లోని ఉజ్జయినికి ట్రాన్స్ ఫర్ అయ్యాడు. అప్పుడే భాగ్యనగరంలో ప్లేగు వ్యాధి సోకి కొన్ని వేల మంది చనిపోయారు. అది తెలుసుకున్న తను సహోద్యోగులతో కలిసి ఉజ్జయిని అమ్మవారి ఆలయానికి వెళ్లి తమ ప్రాంత ప్రజలను రక్షించమని కోరుకున్నాడట. అక్కడ ఆ వ్యాధి తగ్గితే.. ఆ ప్రాంతంలో ఉజ్జయిని అమ్మవారికి ఆలయం నిర్మిస్తామని అనుకున్నారు. అంతే అప్పుడు ఆ వ్యాధి తగ్గిపోయిందట. ఆ తర్వాత 1815లో తను నగరానికి తిరిగొచ్చి అమ్మవారి విగ్రహాన్ని ప్రతిష్టించి, ఆలయ నిర్మాణాన్ని దగ్గరుండి పూర్తి చేయించారు. అప్పటిసంధి ఆషాఢంల బోనాల సంబురాలు మస్తుగా జరుగుతున్నాయి.

​విదేశాల్లోనూ బోనాల పండుగ..

తెలంగాణల జరుపుకునే ప్రతి ఒక్క పండుగకూ ఒక చార్రిత్రక నేపథ్యం అనేది కచ్చితంగా ఉంటుంది. అలాగే శాస్త్రీయత (సైంటిఫిక్ రీజన్) ఉంటుంది. తెలంగాణ సంస్కృతిని సైతం చాటి చెప్పే మాదిరిగానే పండుగలుంటాయి. డప్పులు, తాళాల మధ్య నెత్తి మీద బోనం పెట్టుకుని భక్తి శ్రద్ధలతో భక్తులందరూ అమ్మవారికి బోనం సమర్పిస్తారు ఆడోళ్లు. ఈ పండుగకు దేశవిదేశాల్లోనూ ఒక పేరుంది. ఈ పండుగను విదేశాల్లో సైతం ఘనంగా జరుపుకుంటారు.

​బోనంతో బ్యాక్టీరియకు చెక్..

ఆషాఢంలో అమ్మవారు పుట్టింటికి వస్తారని చాలా మంది నమ్ముతరు. అందుకే బోనాన్ని వండి అమ్మవారికి సమర్పించడమే ఈ పండుగ యొక్క ముఖ్య ఉద్దేశ్యం. అందుకే తమ కూతురే ఇంటికి వచ్చిందని భావించి అమ్మవార్లకు ప్రేమతో బోనం సమర్పిస్తారు. దీని వెనుక ఓ సైంటిఫిక్ రీజన్ కూడా ఉంది. ఆషాఢం అంటేనే వానల కాలం. ఈ కాలంలో ఏవేవో రోగాలు వస్తుంటాయి. అవన్నీ రాకుండా మా పిల్లల్ని సల్లంగా సూడు తల్లీ అని అమ్మవారిని కోరేందుకే ఈ బోనం సమర్పిస్తారు. బోనంలో భాగంగా మట్టి కుండకు చుట్టూ పసుపు పూస్తరు. మొత్తం వేపాకులు కడ్తరు. ఇలా చేయడం వల్ల బ్యాక్టీరియా, వైరస్ లు నాశనమవుతాయి. మన ఆరోగ్యం పైలంగా ఉంటది.

భవిష్యవాణి..

బోనాల పండుగ అంటే బోనం తర్వాతే ప్రతి ఒక్కరికీ గుర్తొచ్చేది పోతురాజే. పురాణాల ప్రకారం ఏడుగురు అక్కాచెల్లెళ్ల అమ్మవార్ల తమ్ముడే పోతురాజు. ఈ పోతురాజుతోనే జాతర సంబురాలు మస్తుగా షురూ అవుతయి. ఇక చివరగా బోనాల జాతరలో చివరి రోజు ఘట్టం చాలా ముఖ్యమైనది. సోమవారం తెల్లవారుజామున మాతంగీశ్వరీ ఆలయం ఎదురుగా వివాహం కానీ ఓ స్త్రీ వచ్చి మట్టికుండ మీద నిలబడి భవిష్యత్తు చెబుతుంది.. దీన్నే రంగం అంటారు. ఇలా ఆషాఢ మాసంలో మొదటి ఆదివారం ప్రారంభమైన బోనాలు నాలుగు వారాల పాటు తెలంగాణ రాష్ట్రంలో ఎంతో ఘనంగా జరుపుకుంటారు. చివరగా ఏనుగు మీద అమ్మవారి విగ్రహాన్ని తీసుకెళ్లి మూసీనదిలో నిమజ్జనం చేస్తారు. ఈ ఏడాది 2022 జూలై 24వ తేదీన బోనాల సంబురాలు పూర్తి కానున్నాయి.



Source link

Leave a Reply

Your email address will not be published.