ఇవి తింటే.. చిన్న వయస్సులోనే గుండె సమస్యలు వస్తాయ్‌..!

ప్రీమెచ్యూర్ కరోనరీ ఆర్టరీ డిసీజ్ అంటే..

చిన్న వయసులోనే గుండె సమస్యలు రావడాన్ని ప్రీమెచ్యూర్ హార్ట్ డిసీజ్ అంటారు. ప్రీమెచ్యూర్‌‌‌ కరోనరీ ఆర్టరీ డిసీజ్‌ ఈ వర్గంలో వస్తుంది, దీనిని CAD అని కూడా పిలుస్తారు. CAD కారణంగా ధమనులలో (అథెరోస్క్లెరోసిస్) ఫలకం ఏర్పడుతుంది. దీని కారణంగా గుండె కండరాలకు రక్త ప్రసరణ తగ్గుతుంది.

NCBI ప్రకారం, 45 కంటే తక్కువ వయస్సు ఉన్న పురుషులు, 55 సంవత్సరాల కంటే తక్కువ వయసున్న స్త్రీలలో కరోనరీ ధమనుల సంకుచితం(narrowing) వల్ల ప్రీమెచ్యూర్‌‌‌ కరోనరీ ఆర్టరీ డిసీజ్‌ వస్తుంది.

అధ్యయనం ఏమి చెబుతోంది..?

కొన్ని రకాల ధాన్యాలు మన గుండె పై ప్రతికూల ప్రభావం చూపుతున్నాయని, మరి కొన్ని గుండె ఆరోగ్యానికి మేలు చేస్తున్నాయని అమెరికన్ కాలేజ్ ఆఫ్ కార్డియాలజీ అధ్యయనంలో తేలింది. మన ఆహార అలవాట్లపై ఆ అధ్యయనం నిర్వహించారు. శుద్ధి చేసిన ధాన్యాలు గుండె ధమనులను తీవ్రంగా ప్రభావితం చేస్తున్నాయని ఈ పరిశోధనలో స్పష్టమైంది. అదే సమయంలో, తృణధాన్యాలు CAD ప్రమాదాన్ని తగ్గిస్తాయని తేలింది. ప్రీమెచ్యూర్‌‌‌ కరోనరీ ఆర్టరీ డిసీజ్‌ (CAD) పేషెంట్స్‌, ఆరోగ్యంగా ఉన్న వ్యక్తులు నింపిన ప్రశ్నాపత్రం ఆధారంగా ఇది తేల్చారు. శుద్ధి చేసిన ధాన్యాలు, అధిక మొత్తంలో చక్కెర, నూనె తీసుకుంటే ఆరోగ్యానికి హాని కలుగుతుందని ఇస్ఫాహాన్ యూనివర్శిటీ ఆఫ్ మెడికల్ సైన్స్‌ పరిశోధకుడు మహ్మద్ అమీన్ ఖాజావి గస్కరీ వివరించారు.

ఈ ఆహారం మీ గుండెకు శుత్రువు..

శుద్ధి చేసిన ధాన్యాలు, శుద్ధి చేసిన పిండి పదార్థాలు, చక్కెర, ఉప్పు ఎక్కువగా ఉండే ఆహారాలు గుండె ఆరోగ్యానికి మంచిది కాదు. ఈ లిస్ట్‌లో వైట్ రైస్, వైట్ బ్రెడ్, మైదా, పాస్తా, నూడుల్స్, బంగాళాదుంప చిప్స్ ఉన్నాయి. మీ గుండె ఆరోగ్యాన్ని రక్షించుకోవాలంటే.. స్వీట్స్‌, బేగెల్స్, కేకులు, వాఫ్ఫల్స్‌, పేస్ట్రీలకు దూరంగా ఉండాలి. స్మూతీస్, ఫ్లేవర్డ్ యోగర్ట్, స్పోర్ట్స్ డ్రింక్స్ తక్కువగా తీసుకోవాలి.

ఇవీ ప్రమాదకరమే..

స్మోకింగ్‌, హైపర్‌టెన్షన్‌, అధిక కొలెస్ట్రాల్‌, డయాబెటిస్‌ కారణంగానూ PCAD, CAD వచ్చే ప్రమాదం పెరుగుతుంది.

ఈ ఆహారం మంచిది..

శుద్ధి చేసిన ఆహార పదార్థాలు తీసుకుంటే.. చిన్నవయస్సులోనే గుండె జబ్బుల ప్రమాదం పెరుగుతుంది. మీ డైట్‌లో తృణధాన్యాలు చేర్చుకుంటే.. గుండెను రక్షించుకోవచ్చు. మీ ఆహారంలో బ్రౌన్ రైస్, వోట్స్, బార్లీ, మొక్కజొన్న వంటి ధాన్యాలు చేర్చుకుంటే మంచిది.

గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.