Chandrayaan 3 Landing: చంద్రయాన్ 3 ప్రయోగం.. అంతరిక్ష రంగంలో తిరుగులేని శక్తిగా భారత్

[ad_1]

Chandrayaan 3 Landing: గత కొన్ని దశాబ్దాలుగా అంతరిక్ష రంగంలో అమెరికా, చైనా, రష్యాలదే పూర్తిగా ఆధిపత్యం కొనసాగుతోంది. అయితే గత కొన్ని సంవత్సరాల్లో కీలక విజయాలు సాధిస్తున్న భారత్.. ఆ అగ్రరాజ్యాలకు ధీటుగా పోటీ పడి.. అంతరిక్ష ప్రయోగాలు నిర్వహిస్తోంది. అయితే ఆయా దేశాలకు ఉన్నంత బడ్జెట్ గానీ.. టెక్నాలజీ గానీ లేకపోయినా ఇస్రో మాత్రం.. తక్కువ ఖర్చుతో రాకెట్లను నింగిలోకి పంపి అప్రతిహత విజయాలతో జయహో భారత్ అనేలా చేస్తోంది. ఈ క్రమంలోనే చంద్రుడిపై చేస్తున్న పరిశోధనలు కూడా ఎంతో కీలకమైనవి. ఇందులో భాగంగానే 50 ఏళ్ల క్రితమే చంద్రుడిపై మిగితా దేశాలు కాలుమోపినా.. చంద్రుడిపై నీటి జాడను ఖచ్చితంగా కనుగొన్నది మాత్రం ఇస్రో ప్రయోగించిన చంద్రయాన్ 1 ప్రయోగం. ఈ ఊపులోనే చంద్రుడిపై కాలుమోపాలని భావించిన ఇస్రో.. చంద్రయాన్ 2 ను పంపగా.. అది చివరి నిమిషంలో కూలిపోయింది. అందుకే ఈసారి మరిన్ని పకడ్బందీ చర్యలతో చంద్రయాన్ 3 ని విజయవంతంగా పంపించింది.

అయితే ప్రస్తుతం ఇస్రో ప్రయోగించిన చంద్రయాన్‌ 3 కేవలం టెక్నాలజీలో అభివృద్ధి కోసమే కాకుండా.. ఆర్థికంగా కూడా భారత్‌ను ప్రపంచ దేశాల్లో కెల్లా మరో మెట్టు పైకి ఎక్కించగలదు. ప్రస్తుతం ప్రపంచ అంతరిక్ష రంగం మొత్తం విలువ దాదాపు రూ.45 లక్షల కోట్లు ఉంటుందని అంచనా. అయితే ఈ అంతరిక్షంలో రంగంలో ఇస్రో సాధించే ప్రతి చిన్న విజయం కూడా దేశ ఆర్థిక రంగాన్ని మరింత ముందుకు తీసుకువెళ్లేందుకు ఉపయోగపడుతుంది. అయితే అంతరిక్ష రంగం అంటే భారీగా ఖర్చు అవుతుందని.. అయినప్పటికీ దాని ఫలితాలు ఎంత వరకు వస్తాయన్నది అనుమానమే. ఎందుకంటే ఒక్క ప్రయోగం ఫెయిల్ అయినా.. వందల కోట్లు, శాస్త్రవేత్తల శ్రమ వృథా అవుతుంది. అయితే అంతరిక్ష రంగంలో పెట్టుబడులు పెడితే నష్టాలే అనే ఆరోపణలను డెలాయిట్‌ రిపోర్టు కొట్టి పారేసింది.
ప్రపంచవ్యాప్తంగా 2013 నుంచి ఇప్పటివరకు అంతరిక్షానికి సంబంధించి టెక్నాలజీ అందిస్తున్న 1,791 కంపెనీలకు 272 బిలియన్‌ డాలర్లు అంటే భారత కరెన్సీలో రూ.22 లక్షల కోట్ల పెట్టుబడులు వచ్చాయి. ఇక స్పేస్‌ ఫౌండేషన్‌ లెక్కల ప్రకారం 2023 జూన్ తర్వాతి నాటికి స్పేస్‌ ఎకానమీ విలువ 546 బిలియన్‌ డాలర్లు అంటే మన కరెన్సీలో రూ.45 లక్షల కోట్లు అని వెల్లడించింది. గత పదేళ్లలోనే ఈ అంతరిక్ష రంగం విలువలో 91 శాతం వృద్ధి సాధించిందని పేర్కొంది. అయితే ఇందులో భారత్.. అతి తక్కువ ఖర్చుతో చేపట్టే ప్రయోగాలు ఇందులో 10 శాతం వాటా దక్కించుకున్నా.. దేశ అంతరిక్ష రంగం భవిష్యత్ దశ దిశా మారిపోతోందని నిపుణులు చెబుతున్నారు.

1999 నుంచి ఇప్పటి వరకు భారత్.. 34 దేశాలకు చెందిన దాదాపు 381 శాటిలైట్‌లను అంతరిక్షంలోకి పంపించింది. ఈ 381 ఉపగ్రహాలను నింగిలోకి పంపించి.. 279 మిలియన్‌ డాలర్లు అంటే రూ.2300 కోట్లకుపైగా ఆర్జించింది. భారత అంతరిక్ష రంగ విలువ 2025 నాటికి 13 బిలియన్ డాలర్లు అంటే రూ. లక్ష కోట్లకుపైగా చేరుతుందని అంచనా వేస్తున్నారు. ప్రస్తుతం 2023 – 2024 బడ్జెట్‌లో కేంద్ర ప్రభుత్వం అంతరిక్ష రంగానికి కేవలం రూ. 12,543 కోట్లు మాత్రమే కేటాయించింది. భారత్‌లో ఈ రంగం విలువ 8 బిలియన్‌ డాలర్లు అంటే రూ. 66 వేల కోట్లు కాగా.. ఇది ప్రపంచ స్పేస్‌ ఎకానమీలో 2 శాతం మాత్రమే.

కానీ అంతర్జాతీయ కన్సల్టెన్సీ ఆర్థర్‌ డి లిటిల్‌ ప్రకారం భారత్‌లో ఈ అంతరిక్ష రంగం 2040 నాటికి 100 బిలియన్‌ డాలర్ల అంటే రూ. 8 లక్షల కోట్లకు చేరుకుంటుందని అంచనా వేసింది. ప్రస్తుతం భారత్‌లో స్కైరూట్‌, శాట్‌ష్యూర్‌, ధ్రువ్‌ స్పేస్‌, బెల్లాట్రిక్స్‌ వంటి 140 స్టార్టప్‌ కంపెనీలు రిజిస్టర్ చేసుకుని పరిశోధనలు చేస్తున్నాయి. ఇవి శాటిలైట్‌ ఆధారిత ఫోన్‌ సిగ్నల్స్‌, బ్రాడ్‌బ్యాండ్‌, ఓటీటీ, 5జీ, సోలార్‌ ప్యానల్స్‌ వంటి రంగాల్లో పనిచేస్తున్నాయి. అంతరిక్ష రంగంలో భారత్‌ తయారు చేసే హర్డ్‌వేర్‌కు కూడా డిమాండ్ పెరుగుతోంది. ఫలితంగా వాటి తయారీ పరిశ్రమల్లోకి పెట్టుబడులు పెరిగి, ఉపాధి అవకాశాలు కూడా పెరుగుతాయని ఆశాభావం వ్యక్తం చేస్తున్నారు.

Chandrayaan 3 Lander: మిత్రమా స్వాగతం.. చంద్రయాన్ 3 కి స్వాగతం పలికిన చంద్రయాన్ 2 ఆర్బిటర్