Aditya L1 Mission: చంద్రుడి మీదికి దిగేశాం.. వారం రోజుల్లోనే సూర్యుడిపైకి ఇస్రో మరో ప్రయోగం

[ad_1]

Aditya L1 Mission: భారత అంతరిక్ష పరిశోధన సంస్థ ఇస్రో.. చంద్రుడిపై ప్రయోగించిన చంద్రయాన్ 3 ని విజయవంతంగా జాబిల్లి దక్షిణ ధ్రువంపై ల్యాండింగ్ చేసింది. ఈ నేపథ్యంలోనే చంద్రుడిపై దిగిన విక్రమ్ ల్యాండర్ నుంచి బయటికి వచ్చిన ప్రగ్యాన్ రోవర్.. తన పని తాను చేసుకుంటోంది. జాబిల్లి ఉపరితలంపై తిరుగుతూ ఫోటోలు తీసి పంపుతోంది. పరిశోధనలు కూడా జరుపుతోంది. ఈ క్రమంలోనే సూర్యుడిపై అన్వేషణకు ఇస్రో సిద్ధమైంది. వచ్చే నెల మొదట్లో ఆదిత్య ఎల్ 1 ప్రయోగాన్ని సూర్యుడిపైకి పంపించేందుకు ఇస్రో ఏర్పాట్లు చేస్తోంది. ఈ క్రమంలోనే ఆదిత్య ఎల్ 1 ప్రయోగ తేదీని వెల్లడించింది.

చంద్రయాన్‌ 3 అందించిన విజయోత్సాహంతో ఉన్న ఇస్రో.. ఇప్పుడు అదే ఉత్సాహంపై సూర్యుడి రహస్యాలను కనుగొనేందుకు ప్రయోగాలు ముమ్మరం చేసింది. సెప్టెంబరు 2 వ తేదీన ఆదిత్య ఎల్‌ 1 ప్రయోగాన్ని చేపట్టనున్నట్లు ఇస్రో అధికారి ఒకరు తాజాగా వెల్లడించారు. సెప్టెంబరు 2 వ తేదీన ఈ ఆదిత్య ఎల్ 1 ప్రయోగాన్ని నింగిలోకి పంపనున్నామని.. ఆ ఉపగ్రహాన్ని ఇప్పటికే ఆంధ్రప్రదేశ్‌లోని శ్రీహరికోటలో ఉన్న సతీశ్‌ ధవన్‌ స్పేస్‌ సెంటర్‌కు తరలించినట్లు చెప్పారు. పీఎస్‌ఎల్‌వీ-సి 57 వాహకనౌక.. ఆదిత్య ఎల్‌ 1 ఉపగ్రహాన్ని మోసుకుని అంతరిక్షంలోకి దూసుకెళ్లనుందని పేర్కొన్నారు. సూర్యుడిపై ఉండే వాతావరణాన్ని పూర్తిగా పరిశోధించాలన్న లక్ష్యంతో ఈ ప్రాజెక్టును చేపట్టినట్లు సదరు ఇస్రో అధికారి వివరించారు. కరోనాగ్రఫీ పరికరం సాయంతో సూర్యుడిపై ఈ పరిశోధనలు చేయనున్నట్లు స్పష్టం చేశారు. యూరోపియన్‌ స్పేస్‌ ఏజెన్సీ, ఆస్ట్రేలియా, ఇతర దేశాల అంతరిక్ష సంస్థల సాయంతో ఇస్రో ఈ సూర్యుడిపై అన్వేషణను చేయనుంది.

ఇక సూర్యుడిపై అధ్యయనం చేసేందుకు తొలిసారి ఇస్రో చేపడుతున్న ప్రయోగం ఇది. 1500 కిలోల బరువున్న ఈ ఆదిత్య ఎల్ 1 ఉపగ్రహాన్ని భూమి నుంచి సూర్యుని దిశగా 15 లక్షల కిలోమీటర్ల దూరంలో ఉన్న లాగ్రాంజ్‌ పాయింట్ 1 (ఎల్‌ 1) చుట్టూ ఉన్న కక్ష్యలో ప్రవేశపెట్టనున్నారు. గ్రహణాలతో సంబంధం లేకుండా సూర్యుడిని నిత్యం అధ్యయనం చేసేందుకు ఈ కక్ష్యలోకి పంపిస్తున్నారు. ఈ ఆదిత్య ఎల్‌ 1 మొత్తం ఏడు పేలోడ్లను నింగిలోకి మోసుకెళ్లనుంది. ‘విజిబుల్‌ ఎమిషన్‌ లైన్‌ కొరోనాగ్రాఫ్‌ (వీఈఎల్‌సీ)తో పాటు సోలార్‌ అల్ట్రావైలెట్‌ ఇమేజింగ్‌ టెలిస్కోప్‌, ఆదిత్య సోలార్‌ విండ్‌ పార్టికల్‌ ఎక్స్‌పెరిమెంట్‌, ప్లాస్మా అనలైజర్‌ ప్యాకేజ్‌ ఫర్‌ ఆదిత్య, సోలార్‌లో ఎనర్జీ ఎక్స్‌రే స్పెక్ట్రోమీటర్‌, హైఎనర్జీ ఎల్‌-1 ఆర్బిటింగ్‌ ఎక్స్‌రే స్పెక్ట్రోమీటర్‌, మ్యాగ్నెటోమీటర్‌ పేలోడ్‌లను అమర్చనున్నారు.

సూర్యుడి నుంచి వెలువడే అత్యంత శక్తివంతమైన కాంతి ప్రభావాన్ని అధ్యయనం చేసేందుకు ఈ పేలోడ్‌లను తయారు చేశారు. ఈ పేలోడ్లు ఎలక్ట్రోమ్యాగ్నెటిక్‌, మ్యాగ్నెటిక్‌ ఫీల్డ్‌ డిటెక్టర్ల సాయంతో సూర్యుడిలోని ఫొటోస్పియర్‌, క్రోమోస్పియర్‌లను అధ్యయనం చేయనున్నాయి. లాంగ్రాజ్ పాయింట్ 1 ప్రదేశానికి ఉన్న సానుకూల పరిస్థితుల దృష్ట్యా ఈ 4 పరికరాలు సూర్యుడిని స్వయంగా అధ్యయనం చేస్తాయి. మిగతా మూడు సాధనాలు.. దాని సమీపంలోని సౌర రేణువులు, అయస్కాంత క్షేత్రాల జాడను పసిగట్టనున్నాయి.

ISRO: ఇక సూర్యుడిపై అన్వేషణ.. చంద్రుడిపైకి పంపించాం.. కొత్త ప్రయోగం రెడీ చేసిన ఇస్రో