యాక్టోలైఫ్ సంతానం లేని దంపతులు బిడ్డను కనడానికి, నిజమైన తల్లిదండ్రులుగా మారడానికి వీలు కల్పిస్తుందని ఆయన పేర్కొన్నారు. అలాగే, కేన్సర్ లేదా ఇతర సమస్యల కారణంగా శస్త్రచికిత్స ద్వారా గర్భాశయం తొలగించిన మహిళలకు ఇది పరిష్కారంలా ఉంటుందన్నారు. ఈ సౌకర్యంలో 75 లేబొరేటరీలు ఉన్నాయని, ఒక్కో దానిలో 400 గ్రోత్ ప్యాడ్స్ లేదా కృత్రిమ గర్భస్థ పిండాలను పెంచగల సామర్థ్యం ఉందని తెలిపారు.

తల్లి గర్భాశయంలోని పరిస్థితులను అనుకరించేలా, పుట్టబోయే బిడ్డకు అనుగుణంగా ఉండేలా ప్యాడ్‌లను రూపొందించినట్లు వివరించారు. దీంతో పాటు గ్రోత్ పాడ్స్‌లో శిశువు హృదయ స్పందన, రక్తపోటు, శ్వాసరేటు, ఆక్సిజన్ స్థాయిలు వంటి ముఖ్యమైన సంకేతాలను పర్యవేక్షించే సెన్సార్లు కూడా ఉంటాయి. ఏదైనా జన్యుపరమైన అసాధారణతలను కూడా పర్యవేక్షించగలదని తెలిపారు.

ఈ గ్రోత్ పాడ్‌ల నుంచి వీర్యం, అండాలను సృష్టించి, ఆపై జన్యుపరంగా ఉన్నతమైన పిండాలను ఎంపిక చేయడానికి కృత్రిమ గర్భధారణ సాంకేతికతను వినియోగిస్తారు. పిల్లల జుట్టు రంగు, కంటి రంగు, ఎత్తు, తెలివితేటలు, చర్మపు రంగు వంటి లక్షణాలు, జన్యుపరమైన వ్యాధులను సవరించవచ్చని చెప్పారు. ఈ సాంకేతికత ఇప్పటికే అందుబాటులో ఉందన్న హషీమ్.. కానీ నైతిక పరిమితులు వాస్తవంగా మారడానికి ఆటంకంగా ఉన్నాయన్నారు. ప్రతి ఫీచర్ పూర్తిగా సైన్స్ ఆధారితమైందని, శాస్త్రవేత్తలు, ఇంజనీర్లు ఇప్పటికే సాధించారని తన వీడియోను ముగించారు.

Read Latest Science and Technology News And Telugu News