Russia: లునా-25 ప్రయోగం ఖర్చెంత..? ఇస్రోపై పై చేయి సాధించాలనే ఆరాటమే మాస్కో కొంప ముంచిందా?

[ad_1]

చంద్రుడి మీద ప్రయోగం కోసం రష్యా చేపట్టిన మూన్ మిషన్ ‘లూనా-25’ ఫెయిల్ అయ్యింది. చంద్రుడి ఉపరితలం మీద అడుగుపెట్టే క్రమంలో లూనా-25 క్రాష్ ల్యాండింగ్ అయ్యింది. దీంతో జాబిల్లి దక్షిణ ధృవానికి చేరువగా అడుగుపెట్టిన తొలి దేశంగా నిలవాలన్న మాస్కో ఆశలపై నీళ్లు జల్లినటయ్యింది. భారత్ చేపట్టిన చంద్రయాన్-3 ప్రయోగానికి పోటీగా రష్యాకు చెందిన రోస్‌కాస్మోస్‌ ‘లూనా-25’ ప్రయోగాన్ని చేపట్టింది. ఇస్రో జులై 14న చంద్రయాన్-3 ప్రయోగం చేపట్టగా.. మాస్కో ఆగస్టు 10న ఈ ప్రయోగాన్ని చేపట్టింది.

చందమామను చేరుకోవడానికి చంద్రయాన్-3కి 42 రోజులు అవసరం కాగా.. లూనా కేవలం 12 రోజుల్లోనే చంద్రుణ్ని చేరేలా రష్యా డిజైన్ చేసింది. ఇస్రో ప్రయోగించిన చంద్రయాన్-3 ఆగస్టు 23న చంద్రుడి ఉపరితలం మీద అడుగుపెట్టేలా ఇస్రో ప్లాన్ చేయగా.. అంతకు ఒక్క రోజు ముందే లూనా-25 చంద్రుడి మీద దిగేలా మాస్కో ప్లాన్ చేసింది. దాదాపు 50 ఏళ్ల తర్వాత (1976 తర్వాత) రష్యా మూన్ మిషన్ చేపట్టడంతో అందరూ దాని గురించి ఆసక్తి కనబర్చారు. కానీ చివరి మెట్టు మీద రష్యా స్పేస్ క్రాఫ్ట్ బోల్తా పడింది. దీంతో ఇప్పుడు అందరి చూపు చంద్రయాన్-3 పైనే కేంద్రీకృతమైంది.

చంద్రయాన్-3 వేగాన్ని నియంత్రించే చివరి ప్రక్రియను కూడా ఆదివారం ఉదయం విజయవంతంగా చేపట్టినట్లు ఇస్రో ప్రకటించింది. ఇక మిగిలింది చంద్రుడి మీద సూర్యోదయం అయ్యాక.. పరిస్థితులను చూసుకొని ల్యాండర్‌ను ఉపరితలం మీదకు దింపడమే. షెడ్యూల్ ప్రకారమే ఇస్రో ఈ ప్రక్రియను చేపట్టే అవకాశం ఉంది. భారత కాలమానం ప్రకారం ఆగస్టు 23న సాయంత్రం 6.04 గంటలకు జాబిల్లి మీద చంద్రయాన్-3 దిగుతుందని ఇస్రో ప్రకటించింది.

ల్యాండర్ వేగాన్ని నియంత్రించే క్రమంలో సాంకేతిక సమస్య తలెత్తిందని దీంతో అది కూలిపోయిందని రష్యా ప్రకటించింది. 2019లో ఇస్రో చేపట్టిన చంద్రయాన్-2 కూడా దాదాపు ఇదే రీతిలో కూలిపోయింది. వాస్తవానికి ఇస్రోతో పోలిస్తే అంతరిక్ష ప్రయోగాల్లో రష్యా స్పే్స్ ఏజెన్సీకి మంచి అనుభవం ఉంది. అద్భుతమైన టెక్నాలజీ కూడా వాళ్ల సొంతం. చంద్రయాన్-3 బడ్జెట్‌తో పోలిస్తే లూనా-25 బడ్జెట్ ఎక్కువ. రష్యా అధికారికంగా ప్రకటించకపోయినప్పటికీ.. లూనా-25 ప్రయోగం కోసం ఆ దేశం రూ.1600 కోట్లు ఖర్చు చేసిందని అంచనా. అదే సమయంలో మూన్ మిషన్ కోసం ఇస్రో చేసిన ఖర్చు రూ.600 కోట్లు మాత్రమే.

కరోనావైరస్‌తో ప్రపంచం మొత్తం అల్లాడిపోతున్న పరిస్థితుల్లో కోవిడ్‌కు వ్యాక్సిన్ కనుక్కోవడానికి ప్రపంచవ్యాప్తంగా ఉన్న శాస్త్రవేత్తలు తలమునకలై ఉండగా.. ‘స్పుత్నిక్-వి’ను ప్రపంచానికి పరిచయం చేసిన రష్యా అధ్యక్షుడు పుతిన్.. కోవిడ్‌కు తొలి టీకాను తాము కనిపెట్టామని ప్రకటించారు. ఇప్పుడు అదే తరహాలో చంద్రుడి దక్షిణ ధ్రువం మీద దిగిన తొలి దేశంగా ఇస్రోను వెనక్కి నెట్టి ఖ్యాతిని తాము సొంతం చేసుకోవాలనే ప్రయత్నంలో పుతిన్‌ సర్కారుకు ఎదురు దెబ్బతగిలింది. ఇస్రో గనుక విజయవంతంగా చంద్రుడి మీద ల్యాండర్‌ను దింపగలిగితే.. భారత ఖ్యాతి, ఇస్రో కీర్తి విశ్వవ్యాప్తం కానుంది. చంద్రుడిపై ప్రయోగంలో ఇస్రోను వెనక్కి నెట్టి ముందుకెళ్లే క్రమంలో రష్యా విఫలం కావడం భారతీయులుగా మనకు ఎంతో కొంత ఆనందం కలిగించిదే. కానీ జాబిల్లిపై ప్రయోగాల్లో ఎదురవుతున్న అవాంతరాలు మాత్రం యావత్ మానవ జాతికి నిజంగా ఓ సవాలే.

[ad_2]

Source link