Fuel Saving: కారు ఎక్కువగా ఉపయోగించేవాళ్లు దాని విషయంలో ఆలోచించే విషయాల్లో మైలేజీ ముందంజలో ఉంటుంది. ఎందుకంటే ఎక్కువ మైలేజీ సాధించగలిగితే తక్కువ పెట్రోలు ఖర్చవుతుంది. దాని ద్వారా మన జేబుకు పడే చిల్లు తక్కువగా ఉంటుంది. కాబట్టి మైలేజీ పెంచడానికి మనం ఎక్కువ కష్టపడుతూ ఉంటాం. ఇలా చేస్తే మైలేజీ ఎక్కువ వస్తుంది? అలా చేస్తే మైలేజీ ఎక్కువ వస్తుంది? లాంటి విషయాలు మనం రెగ్యులర్‌గా వింటూనే ఉంటాం. వీటిలో కొన్ని మాత్రమే నిజాలు ఉంటాయి. కొన్ని ఫాలో అవ్వడం వల్ల ఎలాంటి ఉపయోగం ఉండదు కానీ అవి బాగా జనాల్లోకి వెళ్లిపోయి ఉంటాయి. ఇప్పుడు మనం అలాంటి కొన్ని టిప్స్ గురించి తెలుసుకుందాం.

ట్యాంక్ ఫుల్‌గా ఉండాలి…
కారు కానీ, బైక్ కానీ ట్యాంక్ ఫుల్‌గా ఉంటే పెట్రోల్/డీజిల్ ఆవిరి అయిపోకుండా ఉంటుందని చాలా మంది అనుకుంటూ ఉంటారు. కానీ అది నిజం కాదు. ఎందుకంటే ఇప్పుడు వస్తున్న మోడర్న్ కార్లలో వేపర్ రికవరీ సిస్టమ్స్ కూడా అందిస్తున్నారు. దీని వల్ల ఇంధనం ఆవిరి కాకుండా ఉంటుంది.

పెట్రోల్/డీజిల్ పొద్దున్న పూట పట్టించాలి…
ఉష్ణోగ్రత తక్కువగా ఉన్నప్పుడు ఇంధనం కాస్త చిక్కగా (ఎక్కువ డెన్సిటీతో) ఉంటుందని, దాని కారణంగా తెల్లవారు జామున పట్టిస్తే కాస్త ఎక్కువ క్వాంటిటీ వచ్చే అవకాశం ఉంటుందని కొందరు అపోహ పడతారు. కానీ నిజానికి పెట్రోల్/డీజిల్‌ను అండర్ గ్రౌండ్ ట్యాంకుల్లో నిల్వ చేస్తారు. అక్కడ ఉష్ణోగ్రత నిలకడగా ఉంటుంది.

ఎయిర్ ఫిల్టర్లను రెగ్యులర్‌గా మారుస్తూ ఉండాలి…
ఇది ఒకప్పుడు మంచి మైలేజీని అందిస్తుందేమో కానీ ఇప్పుడు కాదు. ఎందుకంటే పాత కార్లలో ఫిల్టర్ అయిన గాలి కార్బరేటర్లలోకి వెళ్లేది. కాబట్టి మైలేజీ పైన ఎయిర్ ఫిల్టర్ ప్రభావం చూపించేది. కానీ ప్రస్తుతం ఇంజిన్లలో ఫ్యూయల్ ఇంజక్టర్లు, ఇతర టెక్నాలజీ అందుబాటులో ఉన్నాయి. ఇది ఎయిర్ టు ఫ్యూయల్ రేషియోను జాగ్రత్తగా రెగ్యులేట్ చేస్తుంది. ఓక్రిడ్జ్ నేషనల్ లేబొరేటరీ కూడా ఇప్పుడు కొత్తగా వస్తున్న వాహనాల్లో దుమ్ము పట్టిన ఎయిర్ ఫిల్టర్లు మైలేజీపై ప్రభావం చూపించబోవని తెలిపాయి. కానీ దాని కారణంగా ఇతర సమస్యలు తలెత్తే అవకాశం ఉంది.

టైర్లలో గాలి ఎక్కువగా ఉండాలి…
ఇది కూడా అపోహనే. ఎందుకంటే కారు తయారీ దారు కంపెనీ సూచించిన దాని కంటే గాలి ఎక్కువ పెట్టిస్తే అది  టైరు రోడ్డుకు తాకే చోట‘కాంటాక్ట్ ప్యాచ్’ను తగ్గిస్తుంది. అంటే ట్రాక్షన్ కూడా తగ్గుతుందన్న మాట. దీని వల్ల బ్రేకింగ్ డిస్టెన్స్ పెరుగుతుంది. అలాగే టైర్లు కూడా ఎక్కువగా అరిగిపోయే అవకాశం ఉంది. అలాగే మైలేజీ కూడా తగ్గుతుంది.

ఇంజిన్ ఆయిల్ తరచుగా మారుస్తూ ఉండాలి…
ఇంజిన్ ఆయిల్ మార్చడం వల్ల మైలేజీ పెరుగుతుంది అనేది పూర్తిగా నిజం కాదు. కారును మెయింటెయిన్ చేయడానికి ఇంజిన్ ఆయిల్ మార్చడం ముఖ్యమే కానీ దాని కారణంగా మైలేజీ ఎక్కువగా పెరుగుతుందని ఆశలు పెట్టుకోవడం కరెక్ట్ కాదు. మహా అయితే మీ మైలేజీ రెండు శాతం వరకు పెరిగే అవకాశం ఉంది. అది కూడా కారు తయారు చేసిన కంపెనీ తెలిపిన గ్రేడ్ ఆయిల్ ఉపయోగించినప్పుడు మాత్రమే.

ఫ్యూయల్ ఎకనమైజర్లు వాడుతున్నారా?
కొంతమంది ఎక్కువ మైలేజీ కోసం ఫ్యూయల్ ఎకనమైజర్లు ఉపయోగిస్తూ ఉంటారు. అయితే అమెరికాకు చెందిన ఫెడరల్ ట్రేడ్ కమిషన్ వీటి కారణంగా ఉపయోగం ఉండదని తేల్చి చెప్పింది. 100కు పైగా ఫ్యూయల్ ఎకనమైజర్ ఉత్పత్తులను ఉపయోగించాక కూడా మైలేజీ పెరిగినట్లు కనిపించలేదని ఎఫ్‌టీసీ తెలిపింది.

Also Read: లాంచ్‌కు రెడీ అవుతున్న కొత్త స్విఫ్ట్ – సరికొత్త ఇంజిన్, సూపర్ లుక్‌తో!

Also Read: సూపర్ హిట్ టయోటా కామ్రీ అప్‌డేటెడ్ వెర్షన్ త్వరలో – ఈసారి హైబ్రిడ్ ఇంజిన్‌తో!



Source link

Leave a Reply

Your email address will not be published. Required fields are marked *