పవనముక్తాసనం..

పవనముక్తాసనం ఉబ్బరం, గ్యాస్ట్రిక్, మలబద్ధకం సమస్యలను తగ్గించడంలో సమర్థవంతంగా పని చేస్తుంది. ఈ యోగా ఆసనం జీర్ణవ్యవస్థ కండరాలను టైట్‌ చేస్తాయి, ఆహారం ముందుకు వెళ్లడానికి సహాయపడుతుంది. ఇది ప్రేగుల పనితీరును మెరుగుపరుస్తుంది. పవనముక్తాసనం వేయడం వల్ల ప్రేగులు మరింత యాక్టివ్‌గా పనిచేస్తాయి. అపాన వాయువు బయటకు వెళ్ళుతుంది. మలబద్ధకం తగ్గుతుంది. కడుపు శుద్ధి అవుతుంది.

ఎలా వేయాలి..?

విశ్రాంత స్థితిలో వెల్లకిలా పడుకోవాలి. మోకాళ్లను మడిచి, పొత్తికడుపు దగ్గరకు తీసుకురావాలి. చేతులతో కాళ్లను పట్టుకుని తోడలు, పొత్తికడుపునకు ఒత్తిడి కలిగిస్తూ మోకాళ్లు ముఖం దాకా వచ్చేలా చేయాలి. తలను పైకెత్తి, గడ్డం ఛాతీకి ఆనించాలి. ఇలా 60 నుంచి 90 సెకన్లు ఈ భంగిమలో ఉండి, తిరిగి యథాస్థితిలోకి రావాలి.

భుజంగాసనం..

భుజంగాసనం తరచూ ప్రాక్టిస్‌ చేస్తే.. పొట్టలోని కొవ్వు కరుగుతుంది. మలబద్ధకం సమస్యను దూరం చేస్తుంది. ఈ ఆసనం జీర్ణవ్యవస్థ పనితీరును మెరుగుపరుస్తుంది. భుజంగాసనం కండరాలను బలపరుస్తుంది. మలబద్ధకం, అజీర్ణం వంటి సమస్యల నుంచి ఉపశమనం పొందడంలో ఉపయోగపడుతుంది. ఇది ఛాతీని, ఊపిరితిత్తులను బలోపేతం చేస్తుంది. అంతేకాదు, గుండెకూ బలాన్ని చేకూరుస్తుంది.

ఎలా వేయాలి..?

బోర్లా పడుకొని శరీరం మొత్తాన్ని పూర్తిగా సాగదీయాలి. రెండు పాదాల వేళ్లు, మడమలు తాకేలా చూసుకోవాలి. అరచేతులను ఛాతీ పక్కలకు తీసుకొచ్చి, నేలకు ఆనించాలి. శ్వాసను తీసుకుంటూ నెమ్మదిగా తల, ఛాతీని పైకి లేపాలి. మోచేతులు నేలకు ఆని ఉండేలా చూసుకోవాలి. కొద్దిసేపయ్యాక శ్వాసను వదులుతూ తిరిగి మామూలు స్థితికి రావాలి. ఈ దశలో ఛాతీకి దగ్గరగా అరచేతులను నేలకు ఆనించాలి. బలాన్ని చేతులపై మోపుతూ.. శ్వాసను తీసుకుంటూ తల, ఛాతీ, కడుపు భాగాన్ని పైకి లేపాలి. కొద్దిసేపు అలాగే ఉండి శ్వాసను వదులుతూ తిరిగి మామూలు స్థితికి రావాలి.

వజ్రాసనం..

వజ్రాసనం ఉదర ప్రాంతంలో రక్త ప్రసరణను మెరుగుపరుస్తుంది. దీర్ఘకాలిక మలబద్ధకం, కడుపులో సమస్యలు, జీర్ణ సమస్యలు పరిష్కారం అవుతాయి. మలబద్ధకం, అజీర్తి సమస్య ఉన్నవారికి ఈ ఆసనం చాలా ప్రయోజకరంగా ఉంటాయి.

ఎలా వేయాలి..?

రెండు కాళ్లను తిన్నగా చాచి కూర్చోవాలి. ఒకదాని తర్వాత మరో కాలును మోకాళ్ల దగ్గర వంచుతూ వెనక్కి తీసుకురావాలి. పాదాలను పిరుదుల కిందికి తీసుకురావాలి. మడమలు ఎడంగా ఉంచుతూ.. బొటనవేళ్లు తాకేలా చూసుకోవాలి. అరచేతులను మోకాళ్ల మీద ఆనించి ఉంచాలి. తల, వెన్నెముక నిటారుగా ఉంచాలి. కళ్లు మూసుకొని నిదానంగా శ్వాసను తీసుకోవాలి. కొద్దిసేపు అలాగే ఉండి తిరిగి మామూలు స్థితికి చేరుకోవాలి. వజ్రాసనం వేసేటప్పుడు ధ్యాసను శ్వాస మీద కేంద్రీకరించాలి.

అర్ధ మత్స్యేంద్ర ఆసనం..

అర్ధ మత్స్యేంద్ర ఆసనం మూత్రపిండాలు, కడుపు, క్లోమం, ప్లీహము, లివర్‌, పెద్దప్రేగును సాగదీయడం ద్వారా జీర్ణక్రియను మెరుగుపరుస్తుంది. మీ శరీరాన్ని డీటాక్స్‌ చేస్తుంది.. పేగు కదలికలను మెరుగుపరుస్తుంది. మలబద్ధకం సమస్యతో బాధపడేవారు రోజూ అర్ధ మత్స్యేంద్ర ఆసనం ప్రాక్టిస్‌ చేస్తే మంచిది.

ఎలా వేయాలి..?

ముందుగా కాళ్లు చాపి కూర్చోండి. కుడి కాలును వంచి, ఎడమ పాదం వెలుపలి భాగాన్ని నేలపై ఉంచండి. ఎడమ కాలును వంచి పిరుదుల కింద ఉంచండి. ఎడమ చేయి/ మోచేయిని కుడి మోకాలి పైన ఉంచండి. మెల్లగా కుడి భుజాన్ని పైకి లేపండి. కొంతసేపు ఈ పోజ్‌లో ఉండి.. ఆ తర్వాత ఇతర దిశలో పునరావృతం చేయండి. ఈ ముద్రను 3-4 సార్లు చేయవచ్చు.

సుప్త మత్స్యేంద్రాసనం..

సుప్త మత్స్యేంద్రసనం మలబద్ధకం సమస్యను దూరం చేయడానికి ఎఫెక్టివ్‌గా పనిచేస్తుంది. ఈ భంగిమ వెనుక భాగాన్ని విస్తరించి, వెన్నెముకను సమలేఖనం చేస్తుంది. సున్నితమైన ట్విస్ట్ ఉదర అవయవాలను మసాజ్ చేస్తుంది, ప్రేగులలో రక్త ప్రసరణను మెరుగుపరుస్తుంది. ఆహారం పేగుల నుంచి సులభంగా వెళ్లేలా చేస్తుంది.

ఎలా వెయాలి..

ముందు యోగా మ్యాట్‌ మీద వెల్లకిలా పడుకుని. అరచేతులను చాచి.. T-పొజిషన్‌లో పెట్టండి. మోకాలి వద్ద ఒక కాలు వంచి.. భుజాలను ఫ్లాట్‌గా ఉంచుతూ, మెల్లగా వంగిన కాలును వేరే కాలి పైన ఉంచండి. ఈ భంగిమలో కొంతసేపు ఉండండి. ఈ ముద్రను 3-4 సార్లు రిపీట్‌ చేయవచ్చు.

గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.