సూప్స్‌..

జులుబు చేసినప్పుడు వేడివేడి సూప్‌ తాగితే.. ఆ ఫీలింగ్‌ మాటల్లో చెప్పలేం. వేడి సూప్‌ తాగితే.. ముక్కు, గొంతు, ఛాతీలో ఆవిరి ప్రవేశించి జలుబు, దగ్గు నుంచి తక్షణ ఉపశమనం లభిస్తుంది. సూప్స్‌లోని ఎలక్ట్రొలైట్స్ శరీరాన్ని హైడ్రేట్ చేయడానికి సహాయపడతాయి. వెజిటబుల్, చికెన్‌ సూప్స్‌లో పోషకాలు పుష్కలంగా ఉంటాయి. చికెన్‌ సూప్‌ కఫాన్ని కరిగిస్తుందని నిపుణులు చెబుతున్నారు. సూప్స్‌లోని యాంటీ ఆక్సిడెంట్లు, విటమిన్లు, మినరల్స్‌ ఇమ్యూనిటీని కూడా పెంచుతాయి. మీ సూప్‌లో మిరియాలు, అల్లం యాడ్‌ చేస్తే.. దానిలో పోషక విలువలు ఇంకా పెరుగుతాయి.

చికెన్‌ సూప్‌ ఇలా తయారుచేయండి..

ఇవి తీసుకోండి..

బోన్‌లెస్‌ చికెన్‌, ఎముకలు- కప్పు చొప్పున, బిర్యానీ ఆకులు- రెండు, క్యారెట్‌, ఉల్లిపాయ- ఒక్కోటి ( బటర్‌- పావుకప్పు, నూనె- రెండు చెంచాలు, వెల్లుల్లి తరుగు- చెంచా, మైదా, ఫ్రెష్‌ క్రీమ్‌- రెండు పెద్ద చెంచాల చొప్పున, మిరియాల పొడి- పావు చెంచా, రెడ్‌ చిల్లీ ఫ్లేక్స్‌- కొద్దిగా, మిక్స్‌డ్‌ డ్రై హెర్బ్స్‌- చిటికెడు, ఉప్పు- తగినంత, కొత్తిమీర తరుగు- కొద్దిగా

స్టవ్‌ మీద పాన్‌ పెట్టి నూనె వేసి వేడయ్యాక బిర్యానీ ఆకులు, క్యారెట్‌, ఉల్లిపాయ ముక్కలు వేసి ఫ్రై చేయండి. ఆ తర్వాత చికెన్‌ ఎముకలు, ఉప్పు వేసి కాసేపు వేయించాలి. ఇవి వేగాక కాసిన్ని నీళ్లు పోసి మరిగించాలి. మరో స్టవ్‌ మీద పాన్‌ పెట్టి బటర్‌ వేసి కరిగాక వెల్లుల్లి తరుగు, మైదాపిండి వేసి ఫ్రై చేసుకోవాలి. అది వేగాక చికెన్‌ ముక్కలు వేసి మూతపెట్టి కాసేపు ఉడికించాలి. ఇందులో చికెన్‌ స్టాక్‌ను వడపోసి సూప్‌ చిక్కగా అయ్యేవరకు ఉడకబెట్టాలి. ముక్కలు ఉడికిన తర్వాత క్యారెట్‌ ముక్కలు, ఫ్రెష్‌క్రీమ్‌ కలపాలి. ఆ తర్వాత మిరియాల పొడి, రెడ్‌ చిల్లీ ఫ్లేక్స్‌, మిక్స్‌డ్‌ డ్రై హార్బ్స్‌, కొత్తిమీర తరుగు వేసి.. వేడి వేడి సూప్‌ ఎంజాయ్‌ చేయండి.

అల్లం..

అల్లంలో యాంటీ ఇన్ఫ్లమేటరీ గుణాలు పుష్కలంగా ఉంటాయి. వాంతులు, గొంతు నొప్పి, దగ్గు వంటి సమస్యలకు అల్లం ఔషధంలా పనిచేస్తుంది. అల్లం జీర్ణక్రియ మెరుగ్గా జరిగేలా సహాయపడుతుంది. అల్లానికి శరీరంలోని విష పదార్థాలను బయటకు పంపి, రక్త ప్రసరణ మెరుగ్గా జరిగేపాల చేస్తుంది. జలుబు చేసినప్పు అల్లం తీసుకుంటే కఫం కరిగి.. త్వరగా ఉపశమనం లభిస్తుంది. మీకు జలుబుగా ఉంటే.. అల్లం టీ చేసుకుని తాగితే రిలీప్‌ లభిస్తుంది. అలాగా మీ ఆహారంలో అల్లం చేర్చుకోండి.

తేనె..

తేనెలో యాంటీ బ్యాక్టీరియల్, యాంటీవైరల్ గుణాలు ఉంటాయి. ఇది శరీరంలోని హానికారక బ్యాక్టీరియా, ఇతర సూక్ష్మజీవులను నాశనం చేస్తుంది. ఇందులోని యాంటీ మైక్రోబియల్, యాంటీ ఇన్‌ఫ్లమేటరీ గుణాలు దగ్గు, సాధారణ జలుబు నుంచి త్వరగా ఉపశమనం కలిగిస్తాయి. గొంతు నొప్పి నుంచి ఉపశమనం ఇస్తుంది. కొంచెం నీళ్లలో ఒక టీస్పూన్‌ తేనెను కలుపుకొని తాగితే మంచిది. మీ అల్లం టీలో తేనె కలుపుకుని తాగినా బాగుంటుంది. (Image source – istock)

వెల్లుల్లి..

వెల్లుల్లిలో యాంటీ మైక్రోబియల్, యాంటీ వైరల్‌ గుణాలు అధికంగా ఉంటాయి. ఇవి జలుబు, దగ్గు లాంటి సమస్యలతో పోరాడడానికి శక్తిని ఇస్తాయి. వెల్లుల్లిలోని అలిసిన్‌ అనే కెమికల్‌.. ఇన్ఫెక్షన్లతో పోరాడటానికి సహాయపడుతుంది. వెల్లుల్లిని మీ కూరల్లో వేసుకోవచ్చు. లేకపోతే.. ఒక వెల్లుల్లి మొగ్గను బుగ్గన పెట్టుకుని 15 నిమిషాలపాటు దాని సారాన్ని మింగండి.

సిట్రస్‌ పండ్లు..

జలుబు చేసినప్పుడు.. ఆరెంజ్‌, బత్తాయి వంటి సిట్రస్‌ పండ్లు తింటే.. దీని లక్షణాలు ఇంకా పెరుగుతాయని చాలామంది అనుకుంటారు. కానీ, ఇది అపోహ మాత్రమే. మీకు జలుబుగా ఉంటే.. కమల, నిమ్మ, ద్రాక్షను మీ డైట్‌లో చేర్చుకుంటే చాలా మంచిది. ఇందులో ఉండే విటమిన్ సి రోగనిరోధక శక్తిని పెంచుతుంది. ఇన్ఫెక్షన్లతో పోరాడుతుంది. సిట్రస్‌ పండ్లు తీసుకుంటే జలుబు, దగ్గులాంటి అనారోగ్య సమస్యల నుంచి తక్షణ ఉపశమనం లభిస్తుంది. జలుబు ఎక్కువగా ఉండి ముక్కు కారుతున్నప్పుడు వేడివేడిగా లెమన్‌ టీ కానీ, తాజా నిమ్మరసం కానీ తీసుకుంటే రిలీఫ్‌గా ఉంటుంది.

పసుపు..

పసుపులో యాంటీ ఇన్‌ఫ్లమేటరీ, యాంటీ బ్యాక్టీరియల్, యాంటీ సెప్టిక్‌, యాంటీ ఆక్సిడెంట్‌ గుణాలు మెండుగా ఉంటాయి. ఇవి రకరకాల ఇన్ఫెక్షన్లతో పోరాడడానికి అవసరమైన రోగనిరోధక శక్తిని పెంపొందిస్తాయి. వేడి నీటిలో లేదా పాలలో ఒక టీ స్పూన్ పసుపు కలిపి తాగితే జలుబు, దగ్గు సమస్యల నుంచి త్వరగా ఉపశమనం లభిస్తుంది.

ఇవి తినండి..

కాలే, బ్రోకలీ, క్రాన్‌బెర్రీస్, గ్రీన్ టీ, ఎర్ర ఉల్లిపాయలు, బ్లూబెర్రీస్.. వీటిలో క్వెర్సెటిన్ అనే యాంటీఆక్సిడెంట్ ఉంటుంది. ఇది జలుబుతో పోరాడటానికి సహాయపడుతుంది.

గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు.